Fanaposten 4. mars har ein reportasje om ei sak i området mellom Sandalsringen og Kjenndalslia, der helse- og sosialetaten i Bergen planlegg å byggja omsorgsbustader for 15 menn over 25 år med rusproblem og psykiatriske lidingar (ROS) midt i eit tett boligområde ovanfor Kringlebotn skole. Bustadene skal stå ferdige i 2026.

Naturvernforbundet Hordaland meiner det er prisverdig at kommunen prøver å finna nye rustilbod utanfor Bergen sentrum. Men i dette tilfelle dreier det seg om eit populært og mykje brukt nærfriområde for barn frå dei nye byggefelta, og for barnehagar og skular i nabolaget. Området er relativt lite, ein typisk «hundremeterskog» og kallast «Tusseskogen». Det ligg i tett blandingsskog på kanten av skråningen ned mot Kringlebotn, og har vore brukt til beitemark for brukarane på Midtun og Sandalen, men har seinare grodd til med skog, både artsrik edellauvskog og granplanteskog. Planane har møtt stor motstand lokalt, og det er samla inn 754 underskrifter på krav om politisk behandling, noko som er over dobbelt så mykje som dei 300 underskriftene som trengs for å setta fram eit såkalla innbyggarinitiativ. Likevel avviste byrådet v/helsebyråd Ruth Grung kravet, som no går vidare til bystyret.

Naturvernforbundet Hordaland hadde nyleg ei liknande sak ved Helgeplasset i Fyllingsdalen der eit innbyggarinitiativ førte til at kommunen trekte tilbake planane om omsorgsboligar for psykisk utviklingshemma like ved ein lokal leike- og fotballplass med nærliggande naturområde (Benshaugen) med edellauvskog og gamle eiketre. Naturvernforbundet Hordaland meiner difor at Bergen kommune bør gjera det same her, trekkja tilbake forslaget om nedbygging av den grøne lunga i Tusseskogen, og finna alternativ plasering av omsorgsboligane for dei rusavhengige lenger oppe i Sædal-Sandalsområdet der det ikkje skaper så stor konflikt som i dette tilfelle. Det er kritikkverdig av helsebyråden å setta omsynet til dei rusavhengige opp mot omsynet til grøne lunger og leikeplassar i nærmiljøet, når det fins gode alternativ i same område, som er utan tilsvarande konfliktar.

Eg oppmodar alle som har skrive under på innbyggarinitiativet om Tusseskogen til å kontakta dei politiske partia i bystyret for å få dei til å gå mot forslaget frå helsebyråden og verna den grøne lunga i Tusseskogen.